2011-11-17 23:30
CJ君人
嫻姐適當鬧人利養生
[align=center][img=449,600]http://simg.sina.com.hk/cp/0/0075/6521/2/p.jpg[/img][/align][align=center]當選黃大仙龍上區議員嘅工聯會陳婉嫻（右）話自己身體唔錯，只係情緒管理唔得，連醫生都叫佢要「適當地鬧人」。左為區選擊敗李卓人嘅工聯小花劉桂容。（梁家欣攝）[/align]【明報專訊】喺區選重出江湖旋即成為票后嘅工聯會陳婉嫻，雖然寶刀未老，但其實唔少粉絲都擔心年逾60歲、曾經患癌嘅佢，身體應唔應付到繁重嘅議會工作。嫻姐噚日同記者茶敘時話，自己身體ok，已經跟足醫生指示「科學化管理」自己身體，例如每日有足夠睡眠、適當運動同均衡飲食咁，不過有樣嘢佢點都做唔好，就係情緒管理。
嫻姐話，身邊唔少人叫佢唔好鬧人，連中醫都針對嫻姐呢個問題，教落幾招，叫佢喺嬲嘅時候疏肝下火喎。不過，醫生都想到嫻姐好難做到完全唔動氣，唯有建議佢適當地鬧人，可能對身體有好處咁話。
小花澄清唔係「受保護動物」
嫻姐噚日帶埋喺區選一舉擊敗職工盟李卓人嘅「工聯小花」劉桂容同行，喺選舉期間備受保護嘅阿容，澄清自己唔係「受保護動物」，只係選舉嗰日比較忙，無時間同Emily及一眾行家傾偈啫，阿容仲話自己係新人，傾向喺區議會裏面學多啲嘢先，會唔會出選立法會，交畀工聯會決定，有時間要多啲搵嫻姐請教咁話。